@ 
上星期深DUCK一連兩日跟住一班同學仔去咗參加兩個活動，一齊探索科技嘅無限可能性。
1. 藝術科技 : 香港第7屆光雕節
今屆光雕節以「共融·共創·繽紛社區」 為主題，上週六(3/5)移師至深水埗通州街橋底空地舉行，讓參展者更貼近社區，方便同市民分享故事，建立聯繫。
參與學校融合STEM教育，發揮創意及團隊合作，將社區故事、街區風貌 等設計元素 以光雕藝術嘅形式呈現喺大眾眼前。同學仔運用AI、XR技術生成圖片，再加工制作成微電影 同埋光雕投射裝置。作品題材多樣，包括地道美食 、大熊貓生活 等，創意滿分。
深水埗民政專員黃昕然、香港設計中心行政總裁陳娜嘉、策略發展總監林偉強、資訊科技體育基金創辦主席陳岡毅為活動揭開序幕，一齊欣賞各校嘅藝術作品。
活動由香港設計中心主辦，深水埗民政處及資訊科技體育基金（IPF)合辦。香港教育大學教育、人類發展學院教育政策與領導學系及香港青年協會洪水橋青年空間協辦。
2. 航天科技 : 探索國家級衛星遙感科技
香港中文大學參與研發嘅「香港青年創科號衛星」喺上年成功發射，係第一粒由香港創新科技署資助嘅衛星。上星期五（2/5）深水埗區一班中三至中六同學仔去參觀中大嘅衛星遙感地面接收站，了解最新嘅衛星科技同埋相關衛星數據嘅應用場景。
活動中，衛星遙感地面接收站嘅負責人向同學仔講解全港唯一國家級衛星遙感基地嘅運作，仲分享咗如何利用不同嘅衛星照片同埋數據研究系統，更方便觀察個別地區嘅地貌改變，從而分析氣候變化對環境嘅影響。
之後仲有機會一探地面站嘅內部結構，同學仔都話能夠近距離觀察地面站嘅運作係一個非常難得嘅體驗 ！
活動由深水埗民政處與中文大學霍英東遙感科學館合辦，深水埗民政助理專員陳樂桐亦都有出席。
