@ 
風雨季節將至 ，西貢民政專員馬瓊芬近日聯同土木工程拓展署(土拓署)、渠務署及民政處工程部同事，到區內鄉郊地區多個水浸黑點視察 改善措施，包括對面海嘅泰湖閣、蠔涌北路、蠔涌河同南圍村等。
馬專員首先了解土拓署就預防水浸嘅措施同工程進度，包括為泰湖閣住戶安裝擋水閘 ，居民都表示設施有助改善水浸情況。
專員同渠務署同事到西貢蠔涌北路視察排水渠改善工程。工程包括加闊排水渠同加高排水渠側嘅護牆，有助收集更多地表逕流 ，更有效排出至蠔涌河，減低水浸風險。為進一步改善蠔涌路水浸情況，渠務署亦喺蠔涌路至蠔涌村公所一段河堤，喺原有80個疏水孔上，再新增額外5個疏水孔 。路政署亦喺蠔涌河近車公廟兩側護牆下加設疏水孔，疏通暴雨時行人路嘅積水 。
此外，渠務署亦盡量清除蠔涌河嘅淤泥，2024年就一共清淤約150噸，比2023年約120噸更多 。
最後，馬專員同土拓署同事前往南圍306號屋後嘅斜坡進行視察 。為降低暴雨帶來嘅山泥傾瀉風險，土拓署用約100支泥釘加固該幅面積近10米乘30米嘅斜坡，再改善植被提高斜坡穩定性，減低山泥傾瀉嘅風險以保障附近居民 。
民政處會繼續同各政府部門 緊密聯絡及協調，持續完善鄉郊工程，將暴雨帶嚟嘅影響減到最低。
@ 
@