@ 
為守護鄉郊社區嘅安全同提升居民嘅生活，大埔區關愛隊、大埔鄉事會、大埔區撲滅罪行委員會與大埔警區一直合作研究推出喺鄉郊合適地方加裝閉路電視嘅「鄉視計劃」。
5月16日，大埔民政專員陳巧敏、大埔警區指揮官馬偉卿、大埔鄉事會主席林奕權、大埔滅罪會主席陳佩添聯同大埔船灣、林村谷及大埔滘小區關愛隊代表舉行簡單而隆重嘅啟動禮，隨後到大美督村及聯益漁村進行探訪及視察，同村民及長者交流安裝閉路電視嘅好處，亦向長者同佢哋家人示範自行查看錄影片段嘅方法。
其中，專員同關愛隊探訪一位85歲獨居喺聯益漁村嘅老友記。婆婆唔太熟習用手機，加上早前曾留院近一個月，家人本來都擔心佢有時外出或去買餸會難以聯繫。而家有關愛隊協助婆婆喺門前安裝閉路電視，家人就方便掌握婆婆出入嘅動向啦。
關愛隊義工已協助大美督村及聯益漁村共約30戶獨居長者及雙老家庭完成安裝閉路電視。大埔鄉事會亦全力支持鄉視計劃，安排義工於鄉村出入口進行安裝。
在籌備「鄉視計劃」方面：
1警方針對村內主要出入口，就安裝閉路電視角度及位置等向村民提供專業意見，並同時向村民講解預防爆竊等防罪知識；
2 關愛隊協助聯絡村內獨老及雙老家庭以安排裝設閉路電視；老友記嘅家人除咗可以幫手留意門戶，亦可透過遠端網絡，隨時關心長者嘅情況；
3大埔鄉事委員會負責安排義工安裝閉路電視，及連繫村長協調村內風險較高嘅公用位置作安裝選址。
知道計劃目的後村民都積極支持，首輪已有約100個長者戶響應。計劃會陸續遍及大埔區其他鄉村，繼續多方同心，守護鄉郊村民！