@ 
上星期六(17/5)，九龍城民政處安排咗25位參加Y-Dragon 計劃嘅同學仔參觀「明愛土瓜灣廳堂HUB13」及「九龍清真寺」，加深佢哋對多元族裔嘅認識。九龍城區議員利哲宏博士、多位九龍城青年發展網絡顧問及九龍城區青年發展及公民教育委員會委員亦有出席活動，與同學仔一齊探索多元文化 。
第1站嚟到剛於5月開幕嘅明愛土瓜灣廳堂HUB13， 明愛九龍社區中心高級督導主任賴仁彪博士為Y-Dragon詳細介紹廳堂嘅服務理念及設施。顧名思義，HUB13與多元族裔聚居地土瓜灣「十三街」密不可分。HUB13主力服務區內多元族裔，推動文化共融及健康生活，提供各類支援及培訓。除咗有運動室及休憩空間之外，更特設清真廚房 ，照顧不同文化背景嘅街坊需要。經過今次社區探索，Y-Dragon了解到呢度除咗係一個硬件嘅社區配套，仲係一條連結住社區人與人之間嘅橋樑。
第2站去到全港最大嘅清真寺「九龍清真寺」。 好榮幸獲九龍清真寺教長Imam Mufti Muhammad Shoaib親自接待，為同學仔介紹咗九龍清真寺嘅歷史及建築特色，又介紹伊斯蘭教信仰。伊斯蘭教徒從小就學習可蘭經，每日五次風雨不改面朝麥加方向祈禱，讓身心靈得以潔淨。各位Y-Dragon第一次踏入清真寺，深入認識伊斯蘭教嘅文化及日常禮拜儀式等知識，實地上咗一課寶貴嘅公民教育課，學習尊重與共融，為今次活動劃上完美句號。
@