@ 
繼23/4喺黃埔舉行九龍城區首次嘅「流動會客室」之後，九龍城區議會喺尋日（24/5）嚟到土瓜灣街市外，舉行「流動會客室」。好多市民經過都停低同議員交流，人流絡繹不絕。
九龍城區議會主席蔣志豪聯同3位輪值區議員林博、黃文港同潘國華，一齊喺「流動會客室」同市民 分享區內發展嘅最新資訊，包括即將落成使用嘅啓德新急症醫院。市民亦同議員反映區內嘅情況，如區內樓宇問題、環境衛生同市區重建等。
九龍城區議會每月都會輪流喺五個分區－紅磡、土瓜灣、九龍塘、啟德以及何文田，舉行「流動會客室」 ，聆聽街坊嘅意見。下次嘅「流動會客室」將於28/6（星期六）喺九龍城工人俱樂部大廈對出嘅行人路舉行，歡迎九龍城街坊過嚟同區議員交流互動。九龍城區議員會繼續透過「流動會客室」、會見市民計劃以及各種渠道同市民交流，做好「上情下達、下情上報」嘅橋樑角色。
