@ 
由愛心全達慈善基金及九龍城區體育會主辦、九龍城民政處全力支持嘅「九龍地域跳繩錦標賽暨跳繩同樂日2025」上周日（25/5）喺九龍城廣場圓滿舉行。活動以跳繩運動為媒介，推動全民健康生活，吸引來自九龍各區嘅跳繩愛好者參與。中聯辦九龍工作部處長朱杰、港區全國人大代表暨立法會議員梁美芬、立法會議員楊永杰、九龍城民政助理專員胡皓文及一眾區議員等嘉賓蒞臨主禮，共同見證運動健兒嘅精彩表現。
活動分為表演盃及全場地區總決賽，參賽者以精湛技藝展現跳繩運動嘅活力與創意。典禮上，主禮嘉賓為獲獎選手頒發獎牌，佢哋雖然年紀輕輕，但表現絕不遜色。
跳繩除咗係一項運動，更係培養青少年毅力與團隊精神嘅方式。今年適逢粵港澳承辦第15屆全國運動會及第12屆全國殘疾人運動會暨第9屆特殊奧林匹克運動會，民政處希望藉活動進一步推廣全民運動嘅文化。
九龍城區嘅體育活動一浪接一浪。先有今年四月嘅「啟德 Get Set Go」 親子運動嘉年華，然後五月有今次嘅「九龍地域跳繩錦標賽暨跳繩同樂日」，六月由「啟德分區嘉年華」接力，提供多項全運會項目體驗，七月仲有傷健共融嘅運動體驗日，為年底舉行嘅殘特奧會預熱。
九龍城民政處將繼續與不同團體合作，舉辦涵蓋不同形式、主題同種類嘅體育活動，推動活力社區，同大家一齊迎接年底香港有份承辦嘅全運會同殘特奧會。
@ 