@ 
一年一度嘅屯門龍舟競渡 盛事又嚟喇 ！由屯門區龍舟競賽委員會主辦、屯門民政處協辦同民政總署贊助嘅「2025金禧屯門龍舟競渡」，31/5喺屯門青山灣避風塘順利舉行。今年不但慶祝屯門龍舟競渡50周年，更同時慶祝《香港國安法》公布實施5周年同香港回歸28周年，更列為響應第十五屆全國運動會嘅活動 。全運會嘅吉祥物「喜洋洋」同「樂融融」亦到場打氣，寓意喜氣洋洋、其樂融融、團圓和美 ，同場仲有完善選舉制度嘅遊戲攤位畀市民參與。
鑼鼓喧天 ，賽事非常精彩緊湊 ，龍舟健兒展示高水平嘅實力 ，市民到場一齊欣賞精彩嘅賽事 ，氣氛相當熱鬧 ！
政制及內地事務局副局長胡健民亦擔任主禮嘉賓嚟到現場為一眾健兒打氣 ，同屯門民政專員關可臨及屯門區龍舟競賽委員會主席吳瑞麟一齊頒獎 畀健兒，分享大家鍛鍊嘅成果 。
屯門龍舟競渡歷史悠久，除咗延續龍舟競渡 嘅傳統中華文化之餘，亦展現屯門區充滿活力嘅一面。期待下一屆屯門龍舟競渡再見大家 ！
@ 