@ 
灣仔區嘅年度慶回歸大匯演日前(19/7) 圓滿舉行！活動由民政總署贊助、灣仔民政處聯同香港灣仔區各界協會合辦、並由灣仔東、南、西分區委員會協辦，以精彩表演同灣仔居民共慶回歸二十七周年！
除咗灣仔民政處之外，中聯辦港島工作部副部長王卉、香港灣仔區各界協會主席佘靜怡、首席永遠會長莊創業、常務副主席劉珮珊、香港警務處灣仔警區副指揮官賴孝光、西分區委員會主席閻偉寧、東分區委員會主席孫日孝及南分區委員會主席伍凱誠亦蒞臨主禮活動。
大匯演由警察銀樂隊演奏國歌，以及佛教黃鳯翎中學護旗隊展示國旗揭開序幕，氣氛莊嚴隆重。今年嘅主題係「齊心為社區」，有區內多個地區團體同學校嘅踴躍參與，包括聖公會聖雅各小學、嘉諾撒聖方濟各書院、聖雅各福群會、灣仔友好協會、香港四川巴蜀同鄉總會、聚賢薈、香港聲之動力藝術協會及香港灣仔FANS演藝協會等。
為咗將歡樂帶畀每位觀眾，當晚表演勁歌熱舞、精彩紛呈，動靜皆宜！灣仔嘅東分區副主席黃守東同西分區活動工作小組組長宋芝齡擔任司儀，為大家介紹一連串嘅精彩表演，除咗有藝術體操、中國舞、兒童合唱團、兒童管弦樂、古箏演奏，仲有傳統印尼武術表演以及敦煌千手觀音舞，為大匯演增添唔同嘅文化色彩。
一眾表演者喺舞台上大放異彩，現場氣氛熱烈，全場掌聲歡呼不斷！最後仲有藝人獻唱耳熟能詳嘅經典金曲，觀眾都開埋手機嘅電筒，隨音樂節奏製造出一片星海，將全場氣氛帶到全晚最高點，為大匯演畫上圓滿句號，大家都盡興而歸！
今次嘅活動見到社區團結一心，和諧共融。祝願祖國富強昌盛、香港繁榮穩定、灣仔社區穩步向前、居民幸福美滿！
@ 