@ 
做好大廈管理對市民安居樂業有好大作用！大埔民政處19/6聯同新界社團聯會大埔地區委員會及大埔區業主立案法團協會舉辦《2024年建築物管理（修訂）條例》簡介會，吸引超過 70位地區人士出席。其中唔止有經常要支援物管事宜嘅區議員同關愛隊成員，仲包括來自超過30個大埔區屋苑業主立案法團嘅主席、執委、管理公司代表添！
活動希望透過向區內業主及各持份者講解條例嘅修訂內容 ，喺7月13日正式實施前加深大家對條例嘅認識，令佢地喺處理大廈管理工作上更加得心應手 。
除咗修例部分，大廈管理專業顧問服務計劃嘅代表亦有講解如何處理消防安全（建築物）條例及申請市建局資助計劃嘅方法，為區內居民提供唔少實用資訊 。
唔少區議員同關愛隊成員今日亦有參加簡介會。原來佢哋經常喺社區同街坊接觸，所以好重視裝備同加強自己大廈管理嘅知識 ，咁先可以喺社區幫到大家！
活動之後，唔少人都留低同其他業主及參加者分享意見，交流管理大廈或屋苑嘅心得 。大家咁熱心，相信大埔區嘅居住環境會繼續變好！
