@ 
為慶祝香港回歸祖國28周年，荃灣民政處及荃灣區議會聯同荃灣各界慶祝回歸委員會，喺區內嘅主要地點展示各式各樣嘅布置裝飾，尤其喺荃灣四通八達嘅行人天橋 ，國旗同區旗旗海滿布，加上天花橫幅同橋柱嘅裝飾，增添喜慶氣氛。
除此之外，大型掛牆橫額、路邊橫額及燈柱彩旗亦喺荃灣區內不同位置展示，歡迎大家打卡 ，共慶回歸。
而為咗迎接咁開心嘅大日子，荃灣區6月至7月將舉行二十多個不同形式嘅慶祝活動，與區內居民一起熱烈慶祝回歸 ，當中大型重點項目包括：
6月29日上午9:00@沙咀道遊樂場舉行嘅「中小學及制服團體升旗儀式暨中式檢閱」
青少年將以中式步操，展現活力與紀律 ，一同慶祝香港回歸祖國28周年
7月1日晚上7:30@荃灣大會堂舉行嘅「文藝薈萃慶回歸」
作為每年荃灣區慶祝回歸嘅重頭節目，今年文藝薈萃慶回歸繼續邀請唔同嘅藝術團體及嘉賓表演多個精彩項目，當中包括不同中西式嘅特色舞蹈、太極表演、中樂演奏、合唱團表演等 。相信必定能為大家帶來一個歡樂嘅晚上！
