@ 
「2024香港青少年冰球聯賽」啟動啦！由100位運動員所組成嘅六隊隊伍參加比賽，競逐首個香港青少年聯賽嘅冠軍寶座！開球禮早前喺22/7舉行，民政總署副署長易志宏、立法會議員邵家輝、陸瀚民、香港冰球聯賽總會會長康寶駒、香港冰球訓練學校主席胡文新，同埋中國國家女子冰球隊隊員劉智新與一眾主禮嘉賓一齊為運動員打氣！
當日首場比賽由灣仔隊Dragon迎戰東區隊Lion，球員雖然年紀小小，但冰球技術已經相當純熟，喺比賽場上揮灑自如，隊員之間默契十足，兩隊亦展現出團隊精神，為嘉賓同現場觀眾帶嚟一場精彩比賽。
灣仔民政處一直支持地區團體舉辦多元社區活動，亦由2023年開始透過「社區參與計劃撥款」資助地區團體舉辦冰球訓練計劃，為區內6至11歲嘅小朋友提供專業嘅冰球訓練。今年，香港冰球聯賽總會透過灣仔民政處「社區參與計劃撥款」喺7月至8月舉辦「2024香港青少年冰球聯賽」，活動亦獲得香港賽馬會、城巴有限公司、香港鐵路有限公司、九龍巴士(一九三三)有限公司、中華電力有限公司及任天堂香港總代理寶源亞洲集團嘅贊助。
今次嘅冰球聯賽提供更多機會畀兒童，參與呢項具挑戰性嘅運動。灣仔民政處未來會繼續與不同嘅地區持份者合作，為市民舉辦更多唔同類型嘅活動。
@