@ 
3日，大埔民政專員陳巧敏將大埔區青年大使紀念狀，以及大埔區運動衫交畀連續兩屆奧運羽毛球港隊代表鄧俊文！俊文正式成為大埔區青年網絡青年大使，身體力行回饋社區，絕對係大埔之光！
奧運羽毛球港隊代表鄧俊文多次創造佳績，除咗喺2020年奧運歷史性進入羽毛球混雙準決賽，亦曾經喺2018同2021年兩度奪得世界羽毛球錦標賽混雙季軍！闖上高峰嘅俊文繼續維持高水準表現，2025年4月更喺亞洲羽毛球錦標賽2025同拍檔謝影雪勇奪混雙金牌 ！
俊文不但喺賽場上為港爭光 ，亦熱心社區服務及地區青年工作。佢一直非常支持大埔民政處嘅大小地區工作及青年活動，包括民政處、大埔體育會以及大埔區撲滅罪行委員會合辦嘅『FUN』享正向生活活動，向區內青年傳遞積極向上嘅態度。
俊文係大埔土生土長原居民，對羽毛球非常有天份；就讀大埔區小學時獲體育老師發掘，於大埔體育會練習羽毛球 ！由於表現優異，多年來代表港隊出戰多項賽事並取得輝煌成績。佢堅毅刻苦、處事冷靜、敢於接受挑戰，場上場下都不言敗，實在係青年人榜樣 ！
俊文將會以大埔區青年網絡青年大使身份，參與大埔區一系列活動，推動區內喜迎全運嘅氛圍，亦繼續鼓勵區內青年突破自己！
出席活動嘉賓包括，大埔民政專員陳巧敏、大埔鄉事委員會主席林奕權、大埔體育會主席蔡錦光、大埔頭原居民代表鄧銘泰、俊文爸爸兼大埔頭居民代表鄧柏堅。
