@ 
水務署經過數星期嘅努力，已經完成臨時食水管嘅敷設工程，並且喺13/7清晨完成接駁，皇后山一帶嘅居民依家已經飲緊經過新水管嘅食水喇！
接駁工程喺12/7晚開工 ，到清晨順利完成。工程期間，皇后山邨同山麗苑，仲有沙頭角同部分喺打鼓嶺同粉嶺嘅鄉村需要停水，去到朝早大約7點，供水就已經恢復喇。
政府非常重視今次接駁工程 ，務求將對居民嘅影響減到最低 。為咗畀皇后山同鄉郊嘅居民預早準備，同埋支援居民喺停水期間嘅安心用水需要 ，民政團隊就同發展局、水務署及房屋署合作部署，喺區内安排多重臨時水源 ，同預早向居民傳達停水信息。
喺安排臨時水源方面，我哋同水務署同房屋署做足準備，除咗喺皇后山設置嘅水箱數目加倍之外，仲喺鄉郊搵咗26個地點設置水箱，為村民提供臨時水源。我哋又協調水務署向受影響鄉村提供大支裝樽裝水 ，照顧較偏遠鄉村同埋屋企離大路較遠嘅村民。
喺信息傳播方面 ，民政團隊由上星期三(9/7)開始，透過線上線下多渠道向居民廣傳信息，包括喺網上群組廣傳懶人包， 將停水傳單攝入皇后山、沙頭角墟同受影響68條鄉村，總共約15000個住戶嘅信箱 ， 喺各鄉村告示板、當眼地點同交通工具 張貼海報 ， 喺皇后山商場、巴士總站等人流高嘅地點派發傳單 ，等居民做好準備。我哋又組織區議員，夥拍鄉事會同關愛隊出動 ，探訪受影響嘅鄉村、位於鄉郊嘅社福機構同有需要嘅住戶，做停水宣傳同派發樽裝水，北區民政專員賴子堅都有一齊去送水 ，仲同街坊傾吓偈添 。
關愛隊又一連兩日喺皇后山邨同山麗苑，仲有打鼓嶺同沙頭角兩個社區會堂設立街站 ，發放資訊同協助居民。關愛隊又喺兩個社區會堂準備大量樽裝水同水袋 ，一收到call 就會出動送水支援。有村民喺凌晨2點搵關愛隊，因為小朋友唔舒服要求樽裝水，區議員同關愛隊就即刻覺都唔瞓 ，出車送上樽裝水支援！然後區議員同關愛隊再過2個鐘又出發，喺朝早7點開街站。民政團隊唔怕辛苦唔會眼瞓，服務居民就係我哋嘅提神恩物 ！
由復水到依家 ，水質都普遍正常 ，民政團隊會繼續密切留意情況 ，如果有個案就會同部門立即跟進 。
區議員、地區三會同關愛隊喺今次事件展現出超強大動員力，全力配合政府部門，出力做到「民政幫到你」 ，好讓居民所受嘅影響減到最低 。居民嘅安心水源依家得到解決，我哋都放心得下喇！
