@ 
各位滑板發燒友注意 ！荃灣多咗一個全新改造嘅滑板場地等你嚟挑戰！
15/7，荃灣民政專員區家盛、多位荃灣區議員、荃灣區青年社區建設委員會(荃建會)委員、康文署、建築署等代表一齊出席國瑞路公園滑板場翻新啟用儀式 ，見證依個重要嘅時刻 ，一眾參加者仲現場欣賞精彩嘅滑板示範添 ！
今次嘅翻新項目別具意義 ，唔只係國瑞路公園滑板場嘅硬件提升，亦係本屆荃建會自4月1日上任後短短四個月內，參與並見證落實嘅首個社區建設項目 !
荃建會特別成立「滑板場美化工作小組」，由荃建會副主席兼工作小組召集人梁健年帶領，喺短時間內召開多次會議商討設計細節，透過其網絡收集委員及年輕人嘅意見 ，最終制定出一個結合荃灣特色與滑板元素嘅創意方案，並成功提交康文署落實執行。方案包括近20組結合荃灣地標與滑板招式及為滑板運動員打氣嘅標語，例如「三棟屋起跳」、「尖翻城門谷」、「深井跳轉」、「滑出『荃』新境界」等，為滑板場注入既獨特又富有荃灣特色的概念。特別感謝工作小組五位荃建會委員(梁健年、陳明衛、曾奕凱、鄭鍵羲、廖文慧)嘅積極參與，以及康文署接納及安排落實荃建會嘅美化方案。
相信翻新後嘅國瑞路公園滑板場會成為荃灣社區嘅新地標之一 ，吸引市民及滑板發燒友一邊打卡 ，一邊體驗滑板運動 。荃建會亦將繼續積極就社區建設倡議提供建議及反映區內青年意見!
大家不妨趁住暑假，嚟國瑞路公園感受下滑板嘅樂趣啦！
