@ 
颱風韋帕襲港期間，對荃灣多個小區構成影響。荃灣區議員與19支關愛隊發揮重要作用，第一時間將社區實況通報民政處，讓相關部門能迅速調配資源，為居民提供及時支援，減少颱風帶來嘅不便同危險；亦透過自身網絡聯絡相熟小區居民，了解居民所需並適時提供相應支援。
其中，民政處喺十號颶風期間收到區議員及關愛隊通報，荃灣漢民村斜坡上有大樹倒塌，情況驚險，所幸無人受傷，但影響斜坡下寮屋嘅安全。民政處獲悉事件後，隨即聯絡消防處及警方到場支援，並迅速安排受影響嘅兩名寮屋居民緊急撤離至梨木樹社區會堂臨時庇護中心暫避。關愛隊隊員就喺庇護中心悉心安頓受影響居民，並持續關注佢哋嘅需要，提供適切支援。
尋晚(20/7)，荃灣民政專員區家盛去到臨時庇護中心慰問受影響嘅漢民村居民，亦到區內視察區議員與關愛隊協助社區復常嘅工作。區議員與關愛隊隊員喺安全情況下清理吹落嘅樹木殘枝及路面障礙物，協助社區盡快復常。
專員亦到訪區內部分塌樹現場，實地了解清理進度。中國建築社區應急義工隊亦派出專業人員，聯同政府部門加快善後支援，充分展現政、商、民三方攜手合作嘅精神。
民政處、區議員及關愛隊會攜手發揮「民政幫到你」精神，全心全意服務市民。
@