@ 
前日（20/7）颱風韋帕襲港期間，深水埗區關愛隊團結一致，迅速行動，為居民提供支援服務。蘇屋小隊協助獨居伯伯解決膳食問題
蘇屋小隊喺十號𩗗風信號生效期間，收到一名獨居長者求助。伯伯未有儲備足夠食物，但需要定時進食以便服藥，曾經兩度外出嘗試購買食物不果。關愛隊得悉情況後，居於同一幢樓宇嘅義工喺安全情況下隨即為伯伯送上乾糧同蛋糕一解燃眉之急。當晚八號風球除下後關愛隊成員亦再次上門探訪，為伯伯送上熱飯，令伯伯非常感動，連聲感謝關愛隊嘅窩心舉動。
下白田小隊組織義工隊協助善後工作
隨着天文台取消八號熱帶氣旋警告信號+，下白田小隊立即組織一支18人義工隊伍，巡視白田邨內19幢樓宇，協助善後工作，包括移走小型倒塌樹木、清理行人路上樹枝同渠口垃圾，以及扶正跌喺地上嘅巴士站牌同垃圾桶等。大家群策群力，等居民可以盡早回復正常生活。
關愛隊支援臨時庇護中心
民政處亦調配咗南昌北、南昌西、南昌東，石硤尾同南昌中，共5隊小區關愛隊，喺安全情況下，輪流到南昌社區會堂支援臨時庇護中心嘅運作，為入住者送上亁糧同飲品，並透過傾談了解佢哋喺日常生活中有冇其他需要。
各小隊關愛隊與政府部門緊密合作 助深水埗區盡快復常。
各小隊關愛隊亦喺風暴過後走訪各小區視察情況，包括合力清理街道同地盤附近嘅雜物、清走遮蓋交通燈嘅地盤帆布，並即時向部門匯報構成潛在風險嘅路面狀況，竭力保障居民嘅安全。
深水埗區關愛隊會繼續秉承「民政幫到你」嘅精神，凝聚各方力量，喺緊急同突發事故中為居民排憂解難，攜手締造一個守望相助充滿關懷嘅社區。
@ 
@