@ 
尋晚（22/7），深水埗民政處開辦嘅「舊式樓宇優質管理證書課程（第十三期）」基礎課程圓滿結束，而進階課程亦將於聽日（24/7）作總結。
證書課程係深水埗民政處地區主導行動計劃中嘅重要一環。計劃旨在支援區內嘅「三無大廈」，期望透過提供清潔服務同舉辦教育活動，鼓勵業戶成立居民組織，同埋提升大廈嘅管理水平同質素。
課程由多個政府部門同機構代表主講，透過實例分享，深入淺出地講解樓宇管理知識；進階課程更涵蓋業主立案法團嘅運作同樓宇維修等內容。
課堂上，街坊學員專心聽講之餘，更踴躍向講者提問交流。學員們都表示課程內容充實，有助於處理同解决日常生活中遇到嘅樓宇問題。
恭喜各位街坊學員順利畢業！期待大家實踐課堂所學，一齊建設更美好嘅深水埗社區。
