@ 
元朗區39隊關愛隊24/7再次齊集天暉路社區會堂 ，召開第十次工作會議 。會議中除咗檢視關愛隊嘅工作進度之外 ，博愛醫院嘅代表亦到場向關愛隊介紹與長者 有關嘅服務。
會議第一部分先由元朗民政專員胡天祐同埋佢嘅團隊檢視關愛隊整體嘅工作進度之餘，亦都提醒關愛隊一啲日常運作需要注意嘅事項 。關愛隊喺會議上分享咗佢哋嘅服務經歷，又互相交流同埋學習彼此嘅經驗 ，從唔同嘅挑戰之中汲取養份 ，務求讓關愛隊嘅運作更加順暢 。縱使元朗鄉郊同元朗市區各有其獨特性，各隊關愛隊都繼續秉承「民政幫到你」嘅宗旨 ，善用地區網絡，按各小區嘅需要，推展多元化嘅關愛服務。
正所謂「家有一老 ，如有一寶 」，會議嘅第二部份由博愛醫院代表為關愛隊講解有關賽馬會「智康健」腦退化檢測及社區支援計劃，以及 「樂載耆蹤」社區長者支援計劃，期望關愛隊喺上門探訪長者時，能夠協助識別 有需要嘅老友記，為佢哋提供適切嘅幫助 ，並鼓勵佢哋保持年輕嘅心態 ，繼續精靈活潑。
元朗區關愛隊透過日常嘅地區工作，將最新嘅社區資訊傳遞畀有需要嘅居民 ，讓區內唔同年齡層、唔同背景嘅居民都感受到社區嘅關愛 。
元朗區39隊關愛隊將繼續凝聚社區資源同埋力量，支援政府嘅地區工作，致力為元朗區居民提供優質到位嘅服務 ，攜手 締造理想嘅家園。
