@ 
暑假又到喇 ！荃灣區嘅同學仔諗好點樣喺暑期裝備自己未呢 ？荃灣民政處轄下嘅荃灣區青年服務團今年繼續推出「短期職業體驗計劃2025」，安排參加者喺8月進行為期4日嘅職業體驗 。
活動嘅啟動禮已經喺日前（31/7）舉行 ，荃灣民政專員區家盛同各協辦機構代表到場支持 ，仲同參加者交流心得添 ！各位學員亦喺分組時間與各機構代表積極交流，了解職場各種情況，為即將來臨嘅實習作好準備 。
活動計劃今年得到10多間商業及社福機構大力支持 ，提供超過30個體驗崗位 ，涵蓋會計 、法律 、醫療 、金融 、時裝 、社福 、公共服務 、旅遊 、零售 、飲食 等行業，畀學員有機會跟隨業內人士學習，深入了解不同行業 ；計劃仲會有專業社工全程跟進學員嘅參與情況，以及提供職場輔導等 ，幫助佢哋為未來升學及就業作好規劃 ！
參與計劃嘅學員都覺得今次機會難得，急不及待想快啲開始實習體驗，擴闊眼界 ！我哋鼓勵所有學員積極投入成個體驗過程，把握每個學習機會，展現你哋嘅潛力同熱誠！加油 ！
