@ 
北區18隊關愛隊唔經唔覺已經服務咗九個月。除咗提供日常服務外，亦喺突發事件中出動支援，而北區民政處亦有定期為關愛隊提供培訓，令各個小隊可以更專業咁服務市民。一齊睇下最近關愛隊學咗啲乜：
1、北區醫院關愛應變精讀班
北區醫院同北區民政處喺6月舉辦咗「北區醫院關愛應變精讀班」。由北區醫院詳細講解北區醫院急症室災難應變嘅工作，例如病人分流安排，同埋關顧病人同家屬注意事項。關愛隊仲參觀咗急症室，了解同熟悉病人候診區、突發事故候診室同跨部門援助站嘅位置。萬一區內發生緊急事故時，關愛隊就可以更迅速支援傷者同家屬。
北區早前發生咗兩單分別涉及巴士同專線小巴嘅交通意外。北區嘅華明、華都、粉嶺南同盛福關愛隊即刻學以致用，第一時間趕到意外現場為需要送院嘅傷者同家屬提供支援！
2、民安隊應對極端天氣和善後工作分享會
北區民政處喺上星期邀請咗民安隊代表，向關愛隊隊員講解極端天氣下嘅應變知識，例如正確使用救生衣、浮水救生繩同涉水桿等工具；同時又分享咗當手頭無專業工具時，點樣利用日常工具讓關愛隊喺 保護自身安全下，為市民提供適切支援。民安隊隊員亦分享咗關愛隊喺日常服務時嘅有用貼士，提升佢哋嘅服務質素。
