@ 
屯門民政處喺14/8知悉屯門新墟一棟私人大廈嘅地底污水渠滲漏致污水流出地面。有關大廈嘅地底污水渠因日久失修致滲漏，數月前法團曾進行部分維修工程。民政處當時已協助協調部門提供所需嘅協助，以減少污水對公眾嘅影響。
雖然維修大廈公用地方屬法團同物管公司嘅責任，為減少對公眾嘅影響及協助居民，民政處收到再次滲漏嘅消息後隨即同物管公司視察及聯絡食環署加強清洗公眾路面，並同區議員一齊跟進及了解更換污水渠工程進度，亦請物管公司加強同地舖檔主及居民溝通。
維修工程原定16/8進行並完成，但工程期間有較多水滲出路面。除咗法團同物管公司加緊安排換渠工程外，民政處亦即時協調警方協助維持秩序，以及渠務署同食環署協助疏通公眾渠道同安排工人掃水，水務署亦協助工程確認滲漏源頭，一齊為民服務。為加快工程進度，大廈須暫停食水同鹹水供應。民政處安排咗關愛隊為居民提供協助，包括為有需要居民提供瓶裝水。民政處亦協調水務署放置4個臨時食水缸畀居民使用，區議員及關愛隊亦協助居民取水。
喺大家共同努力下，16日深夜已初步完成換渠工程，民政處17日再同區議員及關愛隊視察情況，了解居民需要。民政處會繼續秉持「民政幫到你」嘅精神，密切留意有關情況，為受影響嘅居民提供協助。
@