@ 為響應「全民運動」嘅號召，深水埗民政處、深水埗西分區委員會同深水埗區議會仁愛堂美孚鄰舍中心於前日（16/8）合辦「三葉球全運盃暨『迎全運』同樂日」，吸引咗超過2,000人次參與，現場氣氛熱烈。
1. 三葉球全運盃
三葉球係今次活動嘅重點項目之一，佢係一項新興運動，將網球、羽毛球同乒乓球嘅玩法巧妙結合，簡單易學，所以無論係小朋友定長者都可以輕鬆上手。
活動期間，多支隊伍齊齊角逐「三葉球全運盃」嘅獎項，同時展現高超嘅球技同團隊合作精神。深水埗民政專員王浩宇及西分區主席麥家榮亦有落場同參賽隊伍切磋球技，一齊體驗三葉球帶嚟嘅樂趣。
2. 「迎全運」同樂日
「迎全運」同樂日亦係活動嘅重點之一。因應香港喺嚟緊十五運會承辦嘅八個競賽項目，今次會場亦設置咗八個項目攤位，包括擊劍、棒壘球、手球、保齡球等等，吸引市民踴躍參與，了解唔同運動嘅特色。唔少公公婆婆更帶埋孫仔孫女一齊參與，唔單止促進家庭互動，亦有效鍛鍊肌肉同提升平衡力，寓運動於娛樂。
今次活動旨在宣傳十五運會同殘特奧會，推廣「全民運動」文化，一齊為運動員打氣，攜手共創一個更健康、更有活力嘅社區環境！
