@ 
近期香港天氣炎熱多雨，有利蚊子繁殖。尋日（19/8），北區民政處聯同北區區議會、北區關愛隊一齊出動，響應食環署呼籲 ，喺區內多個地方向街坊宣傳防蚊資訊。我哋派發防蚊單張 ，分享實用防蚊貼士，等大家更清楚點樣應對近期基孔肯雅熱嘅傳播風險！
北區民政專員卓穎然、立法會議員劉國勳、北區環境衞生總監林玉嫦、一眾北區區議員同關愛隊成員，仲有民政處及食環署同事，齊心向街坊講解重點：
1、基孔肯雅熱主要透過蚊子叮咬 傳播，唔會人傳人
2、及時清走屋企同附近嘅積水 ，減低蚊蟲滋生機會
3、出街著淺色長袖衫，搽含有效成分如避蚊胺（DEET）嘅蚊怕水
4、外遊返嚟如果出現發燒、關節痛等症狀，應盡快求醫 ，記得話畀醫生聽你去過邊
北區民政處特別多謝各位議員、關愛隊隊員、義工積極配合政府，除咗尋日嘅行動，過去一個月佢哋積極參與多場防蚊講座 ，仲落區探訪「三無大廈」 等可能滋生蚊患地點，協助食環署嘅滅蚊工作。防控蚊患需要全社區緊密合作 ，大家做足措施，先可以守護健康家園！
