@ 
就尋日（26/8）美孚錄得一宗感染基孔肯雅熱嘅輸入個案，各部門已迅速採取行動，例如食環署已於深水埗區內加強防控，喺受感染人士居所250米範圍內進行密集式霧化處理工作，以殺滅成蚊及防止蚊子滋生，並於今午（27/8）舉行跨部門會議，商討打擊基孔肯雅熱等蚊媒傳播疾病嘅策略。
深水埗民政處亦積極跟進事件。今午，深水埗民政專員王浩宇、深水埗區衛生總督察周振賢聯同美孚聯合小區關愛隊成員、郭彥麗區議員、美孚新邨物管公司代表、荔枝角公園職員及多位政府部門代表展開聯合行動，於美孚港鐵站對岀、萬事達廣場外橋底空間以及荔灣街市進行跨部門宣傳工作，向居民及外籍家庭傭工派發防蚊宣傳資訊及防蚊用品，其後亦到邨內各位置視察環境。居民都好多謝唔同部門以及關愛隊嘅迅速行動，有小朋友仲好乖咁話返到屋企會幫爸爸媽媽手倒走花盆底積水。
各部門會繼續緊密協作，提升區內居民防蚊滅蚊意識，減低基孔肯雅熱於社區傳播嘅可能性。
@ 