@ 
深水埗區內有一幢約60年樓齡嘅舊式大廈，因8月連續多日暴雨導致唯一一部升降機受損而停用。大廈樓高十多層，停用升降機令唔少已年屆90多歲嘅長者戶日常出行十分困難。
深水埗民政處得悉事件後，立即協調機電署、市建局、法團同升降機承辦商，一齊商討維修事宜，尋求最迅速而居民亦可負擔嘅方案。
同時，深水埗民政專員王浩宇亦聯同區議員及南昌西小區關愛隊，探訪大廈長者戶，亦同法團代表直接溝通，了解佢哋嘅實際需要。關愛隊喺停用升降機呢段期間，亦多次「洗樓」探訪有需要住戶，派發糧油食品以備不時之需。
民政處同關愛隊了解到長者戶有出行支援需要，所以聯繫咗慈善機構「拾級善行」，安排喺昨日(29/8)透過電動爬樓梯輪椅，幫助一位住喺十三樓嘅婆婆。婆婆話相隔大半個月可以再次自己落街買鍾意嘅嘢食，既開心又感動，仲話下次覆診有需要嘅話，一定搵關愛隊幫手添。
老友記十分感謝關愛隊嘅貼心服務。有兩位超過90歲嘅伯伯仲特意透過法團向民政處及關愛隊道謝，話切實感受到地區治理團隊喺民生小事嘅用心，將社區關愛帶到每家每戶。受影響大廈嘅升降機維修工程已在進行當中，預期可以盡快重投服務，令居民可回歸正常生活。
事無巨細皆為大，深水埗民政處會繼續結合不同政府部門、關愛隊、區議員及社福機構等各方資源同力量，發揮「民政幫到你」嘅精神，為居民排難解憂，攜手推動良好大廈管理，締造深水埗成為安全舒適嘅社區。
