@ 
傳媒青訓班
第10屆東區青藤學員喺日前(23/7)去咗香港樹仁大學參加傳媒青訓班。透過VR體驗模擬意外事件嘅現場環境，學員扮演政府官員及記者參與「模擬記者會」，學習公開演講技巧，仲喺「綠幕」前學習採訪及拍攝技巧。學員學以致用，發揮團隊精神，各自擔任收音、拍攝、剪接、主播及演出等不同崗位，構思同拍攝模擬採訪短片，切身體驗傳媒嘅工作！香港樹仁大學新聞與傳播學系講師何戎笙亦親臨分享新聞工作經驗，以專業角度評價學員嘅短片作品。學員聽到精彩嘅心得分享同寶貴意見，獲益良多！
參觀民航處總部及機場保安有限公司
青藤學員喺7月31日同東區青年事務顧問一齊參觀民航處總部及機場保安有限公司。民航處嘅電子工程師、民航事務主任及航空交通管制主任分享咗佢哋嘅日常工作同埋入職要求，仲開放咗航空教育徑及控制塔模擬器畀學員參觀。學員親身體驗到航空交通管制人員嘅實習訓練。
學員之後參觀機場保安有限公司，了解機場保安系統及設施，例如人面識別系統、X光行李檢查等，更認識到快速應變部隊裝備，仲可以近距離接觸機場保安犬，真係大開眼界！
透過活動，學員對社會上不同崗位嘅人士喺各自工作領域上默默發揮所長、互相分工合作、便利市民生活嘅專業精神感到佩服！
@ 
@