@ 
騙徒手法層出不窮，真係要時刻保持警覺，仲要提醒埋身邊嘅家人朋友一齊「智防騙局」，避免誤墮騙徒陷阱。為咗幫大家裝備更多防騙知識，九龍城民政處聯同香港中資銀行業協會上星期六（30/8）喺紅磡社區會堂舉辦「龍城智防騙」講座，吸引咗逾百名地區領袖及來自不同背景及年齡層嘅市民參與，反應熱烈。
九龍城民政專員Ivanhoe喺活動中提到，而家騙徒手法日新月異，大家必須要時刻保持警惕，同時更要將學到嘅防騙知識傳播開去，提醒身邊嘅家人朋友一齊提高警覺。
活動由兩位重量級嘉賓擔任講者，分別係香港金融管理局助理總裁陳景宏同警務處商業罪案調查科反詐騙協調中心黎達程督察。陳助理總裁先以豐富嘅實戰經驗同專業知識，為大家講解銀行業為保障客戶而採取嘅防詐騙措施。及後黎督察為大家分析詐騙最新趨勢，深入剖析最新詐騙手法，分享咗好多實用嘅防騙技巧。參加者都好大讚兩位嘉賓嘅分享生動有趣，內容貼地，有助大家提高防騙意識。大家都好樂意協助將防騙資訊分享畀身邊嘅人，亦會不時去 「防騙視伏器」了解最新資訊。
九龍城民政處會繼續舉辦更多防騙活動，一齊將防騙訊息傳遍社區每一個角落，攜手打擊騙案，打造更安全嘅社區環境！
@ 