@ 
承接6月舉辦嘅「沖滿愛•咖啡師工作坊」 ，沙田民政處、沙田區青年網絡與華潤創業攜手合作，展開為期10日嘅咖啡師實習計劃 ，為青少年提供珍貴嘅實戰經驗。
行政會議成員及立法會議員陳克勤、全國政協委員及立法會議員李鎮強、立法會議員李梓敬、沙田民政專員余懷誠、華潤創業副總裁馮凱、副總裁兼太平洋咖啡董事長李楠及職工聯誼會副總幹事葉文斌，仲有沙田區議員同地區委員會嘅正副主席，齊集科學園嘅華潤科學研究院，支持15位年青人正式開展實習計劃 。嘉賓學員打成一片，齊齊嘗試磨咖啡豆同沖泡咖啡 ，分享年青人嘅夢想。
實習計劃內容豐富，有咖啡店門市訓練、參觀中央廚房同埋神秘顧客體驗等等 。學員仲會配對一位由沙田地區人士擔任嘅「友師」 ，陪伴佢哋實習、成長。
專員鼓勵學員珍惜學習機會 ，啟發新思維 。其中一位「友師」，同時亦係2021年華潤創業主辦嘅 「沖出夢想大灣區創業培圳計劃」 優勝者王樂頤 ，以自身經歷勉勵學員裝備好自己，搵出發光發亮嘅人生舞台 。
呢班學員同友師25/8將會喺沙田大會堂廣場同大家分享學習心得，記得一齊嚟支持佢哋 ，仲有關注沙田區青年網絡嘅Facebook專頁 ，隨時獲得最新消息同埋報名資訊！
@