香港首座發電廠喺1890年開始運作,座落灣仔日街、月街、星街一帶,街名取自《三字經》嘅「三光者,日月星」,喻意電力帶嚟光明。發電廠率先燃亮海旁50支街燈,照亮街道之餘,亦為船隻指引靠岸嘅方向。隨著香港發展嘅步伐,街燈款式亦不斷演進,由早期饒富藝術美感嘅設計,到工業時期簡約實用嘅風格,再到九十年代漸趨多樣化,猶如香港歷史嘅寫照。
由即日起至2025年1月,50支復古燈會喺灣仔「水上運動及康樂主題區」附近嘅海濱站展出。我哋仿製咗過去百幾年間,八款曾經採用過嘅電街燈,透過喺灣仔海濱重置50支歷代街燈,以點點燈火構建時間迴廊。
亮燈儀式「閃爍燈影耀灣仔」喺2/8 順利舉行,由灣仔民政專員張雁伶、灣仔區青年社區建設委員會主席莊創業、海濱事務委員會主席何文堯、香港電燈有限公司董事總經理鄭祖瀛及灣仔區議會提振地區經濟專責工作小組主席孫道弘擔任主禮嘉賓。當日仲特別請嚟兩位區內同學即場演奏色士風,場面熱鬧 。
項目由灣仔民政處及灣仔青年社區建設委員會主辦,發展局海濱事務委員會及香港電燈有限公司協辦。
小編仲計劃埋個半日行程畀大家 :
>先喺灣仔區内發掘特色餐廳、小店及遊覽灣仔舊區建築
>再趁黃昏時分,喺灣仔海濱觀賞漫天紅霞
>日落後就可以同亮燈嘅50支歷代街燈打卡,了解香港街燈發展史及感受復古情懷
> 最後去灣仔渡輪碼頭搭乘天星小輪,欣賞維港兩岸夜景