@ 
「Y-Dragon計劃」由九龍城民政處、區內中學同青年服務機構三方攜手推行，已經嚟到第四屆(2024-2026)喇，今屆吸引咗148位嚟自15間中學嘅青年加入成為Y-Dragon！除咗參加由民政處主辦嘅活動之外，Y-Dragon喺8間青年服務機構嘅社工同導師帶領下，籌劃並實踐一個為期20個月嘅義工領袖訓練計劃！由2024年8月開始到依家，Y-Dragon已完成160次嘅籌備/訓練活動同義工服務，總時數超過410小時。活動多元化，包括整手工皂、教長者用手機、探訪長者、派食物畀有需要人士，仲有唔同類型嘅工作坊，主題包括甜品、和諧粉彩、沙畫蠟燭等。
今個暑假，九龍城民政處喺8月舉辦咗3日2夜領袖訓練營2025，希望提升Y-Dragon嘅團隊精神、溝通技巧 同解難能力，栽培佢哋成為一名義工領袖。同學仔都極度投入，勇於嘗試唔同嘅活動，包括攻防箭、水上竹筏、巨人梯、野外烹飪及攀高牆等，非常考驗各位Y-Dragon嘅勇氣同毅力。
喺野外烹飪環節中，從搭建炭爐、切割及醃製食材，到烹調都由Y-Dragon同學仔負責，唔好睇佢哋仲係中學生，有同學仔已經識處理唔同嘅食材，煮起嘢食上嚟都有板有眼，味道仲唔錯添。好多Y-Dragon更加喺呢3日2夜訓練營成功突破自己，更體會到團隊合作嘅重要性。
