@ 
環境好啲，住都住得開心啲！北區民政處同區內各政府部門，一直關注區內街道管理同環境水平，亦不時組織跨部門清理雜物阻街聯合行動，改善街道清潔。一齊睇下最近嘅聯合行動啦！
上水馬會道一條後巷堆積咗唔少大型傢俬及廢棄電單車等雜物，阻塞通道，而巷內寮屋簷蓬頂，亦堆積咗疑似膠水喉通等物件，衍生安全風險。
北區民政處5月組織咗大型行動，聯同警務處、食環署、社會福利署、機電工程署同北區地政處，清理堆積喺後巷同簷蓬上嘅雜物。清理過後，後巷乾淨企理咗好多，亦清除咗安全隱患，附近街坊都畀like！
鏡頭一轉去到沙頭角墟！自從1月實施旅遊開放措施後，遊客人數穩步上揚。順興街嘅海堤係其中一個熱門景點，海堤側邊嘅沙頭角海濱休憩處同長廊亦係街坊晨運嘅地方。北區民政處喺7月聯同土木工程拓展署、食環署、康文署、海事處同北區地政處，組織咗一次海陸聯合行動，希望改善嗰度嘅環境衞生。
除咗清理海堤上嘅非法構築物同垃圾，亦都加強沙頭角海濱休憩處同長廊嘅清掃。而喺海堤對出嘅避風塘，海事處就派出船隻，打撈埋海面嘅垃圾同清理漂浮雜物。行動過後，無論海面定陸上嘅環境都改善咗好多，街坊同遊客都可以enjoy啦！
