@ 
由荃灣體育節統籌委員會、荃灣民政處、仁濟醫院及荃灣區體育康樂聯會合辦嘅第三十一屆荃灣體育節 ——「體育節啟動禮暨『荃』城躍動迎全運會項目體驗日」已於日前（21/9）喺荃灣體育館隆重舉行！
活動內容非常豐富 ，包括多個運動體驗項目同攤位遊戲 、緊張刺激嘅三人籃球友誼賽 ，仲有介紹第十五屆全運會及殘特奧會嘅主題展板同打卡位 ，推動市民一齊支持呢項體育盛事 。
啟動禮邀請到全國運動會統籌辦公室主任楊德強、荃灣民政專員區家盛、前香港武術代表隊隊長鄭家豪蒞臨主禮 。典禮上亦有荃灣區同學仔帶來精彩嘅啦啦操 及花式跳繩表演，武術團體展示氣勢十足嘅武術套路 。剛於世錦賽奪得兩金一銀嘅中國香港武術代表隊成員劉寶欣亦親臨分享心路歷程並即場示範，引來全場掌聲不斷 。
當然唔少得全運會吉祥物 「喜洋洋」同「樂融融」 登場啦！ 兩位人氣王即場被粉絲包圍瘋狂打卡 ，氣氛推至高峰 。大家都話要多做運動，一齊響應「荃」城迎全運！
荃灣體育節由即日起至明年2月將繼續帶嚟一系列精彩活動 ，誠邀大家踴躍參加，一齊感受運動樂趣 。
