@ 
為慶祝國慶76周年，大埔民政處、大埔區議會、新界社團聯會大埔地區委員會及大埔各界慶祝國慶籌備委員會一連兩日喺區內合辦兩場盛事，為大埔區連串慶祝活動揭開精彩序幕！
民政總署署長杜潔麗、中聯辦新界工作部副部長王卉、大埔民政專員陳巧敏、港區全國人大代表陳勇、立法會議員何俊賢、李梓敬及郭玲麗 ，與一眾主禮嘉賓27/9由已列入非物質文化遺產嘅「遊夜龍」 引領到善用林村河天然環境 打造嘅水上舞台，為「林村河水上舞台及煙火匯演」主持啟動禮。
大會除咗為大埔區居民呈上大埔管弦樂團、大埔足球會等多個團體嘅精彩表演外，更加喺廣惠橋上進行煙火表演，與市民共賀國慶 ！ 眾多節目之中，最特別嘅莫過於由三位粵劇演員喺水上舞台演出經典嘅《白蛇傳》！有橫跨林村河嘅多條橋樑做背景，大家耳熟能詳嘅西湖斷橋如在眼前，難怪岸邊超過5000名觀眾都為許仙、白素貞同小青拍爛手掌！
此外，首次於大埔寶湖道小型足球場舉行一連兩日（27-28/9）嘅「國慶嘉年華暨同鄉市集」 亦深受歡迎。活動結集76個攤位，除咗有多個省市嘅家鄉特色商品及地道特色小食 、仲有全區19隊關愛隊準備嘅攤位遊戲 ！加上歌手及地區團體獻上功架十足嘅舞台表演 ，首日活動吸引近15000人支持。市民一家大細促進地區經濟之餘，亦感受熱烈嘅國慶氣氛，滿載而歸！
超強颱風樺加沙早前襲港 ，但憑颱風前大埔民政處及大埔區議會聯繫各政府部門同關愛隊全力做好防風工作 ，成功令市民受到嘅損害及影響減到最少。風後，喺大埔民政處協調下各界亦快速復常。如杜署長為水上匯演致辭時所講，今次活動能順利如期舉行，正正係結集政府、商界、同鄉社團、漁民團體、關愛隊等多方面力量同心合力下嘅成果 。
祝願祖國富強昌盛，國泰民安！
