@ 
面對颱風樺加沙來襲，各個政府部門都以減低風暴對市民造成嘅影響為首要目標，迅速行動。風暴來臨前（23/9）上午，荃灣民政專員區家盛聯同消防處新界南總區、荃灣警區、區議員及關愛隊，一齊去到容易受海水倒灌影響嘅地區—— 深井新村，探訪低窪地點住戶 ，並呼籲居住喺有可能發生水浸嘅寮屋居民盡早撤離到臨時庇護中心 。專員亦統籌消防處及警方預先制定有較高水浸風險嘅寮屋清單 ，方便有需要時進行緊急撤離工作 。消防處亦提前部署，喺村內設置咗唔同嘅求生設備，包括救生繩 及救生艇，以防萬一。
同時，專員亦去到深井天主教小學嘅臨時庇護中心視察，確保物資充足 、設施完善。9月24日上午十號風球嘅期間，消防員協助疏散30多名深井新村嘅居民。所有居民都安全暫居於臨時庇護中心，並於當日傍晚平安回家。
風暴過後，專員於24/9晚上再次出動，聯同區議員及關愛隊，慰問因受深井水浸影響而曾入住庇護中心嘅居民，了解佢哋嘅需要。專員之後亦到訪咗梨木樹社區會堂臨時庇護中心，與入住該處居民面對面交流，聆聽心聲 ，確保大家獲得適切協助。
荃灣民政處與地區人士積極溝通 ，及時傳達社區狀況 ，協助各政府部門迅速掌握實情並展開善後行動，讓受影響區域嘅民眾盡早回復日常生活。民政團隊衷心感謝所有參與救援及協助復常工作嘅人員 ，亦感激居民嘅配合 與體諒 ，攜手推動各項善後工作，讓社區早日恢復正常。
無論風雨幾大，荃灣民政處都幫到你！
