@ 
上星期(27/9 – 4/10)，深水埗民政處青年網絡「深青躍動」帶領20位區內學生展開為期8日7夜嘅意大利文化藝術探索之旅。本次交流以「設計、文化、藝術」為主題，團員除咗有機會到中國駐意大利大使館了解中意合作及國際外交外，仲去咗時裝設計公司同兩間設計院校考察，同當地設計師及師生交流互動，建立跨國友誼，收獲豐富嘅學習體驗同難忘回憶。依家就等我哋分享吓旅程嘅重點活動啦：
設計院校交流 — 傳統與創新並重
喺國際知名嘅米蘭時裝學校 (L.I.S. Caterina da Siena)，團員學習如何將激光打印同3D打印技術 應用喺設計上，仲試用咗傳統織布機，感受如何將創新與傳承結合。佢哋之後仲去咗羅馬嘅設計學院 (L.I.S. Donato Bramante) ，喺老師指導下練習電腦繪畫、速寫與線條技巧，老師仲大讚團員嘅藝術觸覺與創意潛能添。適逢中秋，團員亦向意大利師生介紹節日，同佢哋一齊製作燈籠，促進中西文化交流。
國際時裝公司考察 — 美學與匠人精神
恰巧碰上米蘭時裝周，團員有幸獲國際時裝品牌創辦人親自講解高訂成衣從靈感到生產嘅製作流程。負責人仲向團員介紹米蘭嘅工作室，講解不同面料嘅特質及工藝技巧 ，學習「意大利製造」嘅匠人精神。
參訪中國駐意大利大使館
交流團十分榮幸獲張凌宵參贊接待，了解領事服務、外交運作，以至中意喺經貿、教育及文化嘅交流協作。團員分享米蘭寫生作品同想法，使館人員聽取後讚賞團員嘅創意與投入，並勉勵同學們要把握交流學習嘅機會，發掘一己所長，將來回饋社會。
交流團圓滿結束，稍後將舉辦分享會分組匯報關於意大利文化、歷史與人文交流嘅體會。
