@ 
屯門區一年一度盛事「屯門沙灘節」啱啱喺過去嘅禮拜六（11/10）舉行，超過 3,000人嚟到屯門黃金泳灘同新咖啡灣泳灘享受陽光同玩遊戲 ，感受一個超級好FUN周末！我哋一齊回顧下活動花絮，重溫沙灘上嘅熾熱氣氛！
現場除咗有堆沙工作坊 、藝墟同埋攤位遊戲之外，仲特別安排咗沙灘排球比賽環節。沙灘排球係第十五屆全運會香港承辦嘅競賽項目之一，一眾運動健兒施展渾身解數，為觀眾呈現一場又一場精采嘅比賽 ！而今年亦繼續舉辦「全港青年人BandShow比賽」，各個參賽隊伍都表現出色！壓軸重頭戲「沙灘音樂會」星光熠熠，歌星們傾力演出，各位粉絲有眼福又有耳福！
民政及青年事務局局長麥美娟、民政總署署長杜潔麗、中聯辦新界工作部副部長王卉、屯門民政專員關可臨、屯門區議會大型活動工作小組主席雲天壯、屯門鄉事委員會主席劉業強、屯門警區指揮官馬偉卿同埋屯門區康樂事務經理雷靄儀，同埋一眾支持機構嘅代表一齊嚟到會場主持啟動儀式，將沙灘節嘅活力同埋快樂分享畀現場嘅每一位！
