@ 
教育係培育社會未來棟樑嘅鑰匙，東區青藤計劃一直鼓勵學員作生涯規劃，思考未來升學路向。東區民政專員陳尚文同東區青年事務顧問早前帶領第10屆青藤學員喺17/7同8/8分別參觀香港教育大學（教大）同埋香港恒生大學（恒大），了解不同院校學科嘅資訊，仲同一班大學生開心交流，了解大學生活同選科問題。
學員喺教大參觀咗蒙民偉圖書館設施，體驗延展實境同VR技術，並由宿生代表帶領參觀羅富國堂宿舍，以及分享大學生活點滴。教大仲安排咗本科招生講座 ，學員都專心聆聽大學嘅入學要求。
8/8學員就去咗恒大，由人文社會科學學院副院長馮啟陽博士親自介紹本科課程內容，探討大學意義。恒大師友接著帶學員遊走校園，參觀創意人文館等設施。恒大傳播學院亦安排咗學員喺攝影棚體驗電視電影製作，分組實踐唔同崗位嘅拍攝工作，模擬奧運會新聞報導，同製作電台廣播節目，學員增廣見聞，對未來升學計劃有更多想法，收穫滿滿。
