@ 
上回睇咗上星期六舉辦嘅屯門沙灘節，而其實喺同一周末，屯門文娛廣場一樣人頭湧湧！因為大概12萬人次市民同埋遊客參加咗一連3晚（10/10-12）嘅「18區日夜都繽紛 — 夜屯園」 ，盡情感受屯門超級好FUN周末！
場內超多嘢玩 ，除咗買嘢食 、睇表演 、製作鈕花文化工作坊 、無人機足球體驗 、同埋懷舊打卡點 之外，仲有全港首創嘅「霓虹花炮」！霓虹技藝舊年列入香港非遺清單，我哋特別安排霓虹導賞團，等市民可以認識霓虹嘅人手製作技藝，再加上花炮嘅傳統新界鄉村特色，用創意演繹傳統，既有趣又學到新嘢 。好多年輕人都對非遺手藝以及懷舊香港場景充滿好奇 ，家長同小朋友講番自己兒時生活點滴 ，一家大細樂也融融。現場仲有好多政府吉祥物作為公關大使 ，宣傳政府信息，深受小朋友同大人嘅喜愛 ！
夜屯園獲得民政及青年事務局局長麥美娟、民政總署署長杜潔麗、屯門民政專員關可臨、屯門區議會提振地區經濟專責工作小組主席劉業強、屯門各界協會主席雲天壯、康文署非物質文化遺產辦事處總監吳雪君、屯門警區指揮官馬偉卿、中聯辦新界工作部副處長劉景峰、屯門區康樂事務經理雷靄儀到場主禮及支持 。局長致辭時特別提到，超過60名青年義工喺夜屯園現場提供協助，對於一班充滿活力有幹勁嘅年輕人參與地區工作深受鼓舞 。
活動三晚有12萬參加者，美食攤檔都做唔停手 ，有檔主仲話單係其中一晚嘅生意額已經夠佢舖頭交一個月租！屯門文娛廣場周邊嘅大型商場亦推出消費及飲食優惠 ，藉此加強聯乘同埋協同效應，將盛事活動經濟效益最大化 ，並且鼓勵大家更深入認識屯門多層次嘅魅力 。
