@ 
荃灣民政專員兼荃灣區議會主席區家盛日前聯同一眾荃灣區議員，分別參觀渠務署及漁農自然護理署轄下設施，了解政府部門如何運用專業知識，提供服務，推動城市發展及兼顧自然保育 ，並與兩署嘅管理層交流。
喺10月10日，渠務署署長莫永昌接待區主席及議員參觀荔枝角雨水排放隧道。其間，莫署長講解渠務署喺荃灣區防洪 、污水處理 及渠管復修 方面嘅工作，分享綜合防洪管理策略 同「適應、應變和管理」措施，並即場示範清淤機械人嘅操作 。議員仲有機會睇到全港 區渠蓋設計比賽嘅優勝作品，當中梗係唔少得荃灣區嘅特色—— 印有荃灣天橋圖案嘅渠蓋 。
今次參觀令議員更深入了解荃灣區以至全港嘅渠務規劃。面對近年極端天氣 帶來嘅挑戰，荃灣民政處及區議會會繼續與各政府部門協作，推動社區防災意識 ，共同提升地區防洪及應變能力 。
區主席亦喺10月14日聯同一眾區議員參觀漁農自然護理署位於古洞北嘅塱原自然生態公園，由漁護署副署長黎存志講解公園嘅規劃、管理及生態價值，介紹呢個集濕地保育 、農耕作業 與自然教育 於一身嘅生態保育區 。
塱原自然生態公園打破以往地權分散嘅限制，透過主動復修荒廢農地，打造濕田、淺水池等濕地生境，並興建灌溉水道 ，實現「生態友善耕作」 。透過今次參觀，議員了解如何實現「發展與保育並存」 ，並會進一步探討如何在社區工作中推廣好好保護自然生態嘅概念 。