@ 
南區民政處、南區青年團同南區青年發展及公民教育委員會舉辦咗為期兩個月嘅「慶祝香港回歸祖國28周年：夏日興趣研究所」。呢個夏日研究所節目非常豐富，活動包括匹克球初體驗、室內無人機工作坊、果膠手繪體驗班、手匠創藝DIY、塗鴉藝術創意班、狼人殺大賽、劇本殺體驗班、青年樂隊訓練等，簡直應有盡有，同學仔可以喺課餘時發掘更多五花八門嘅新興趣，創造無限可能！
除咗興趣班，活動仲特意加插社區服務環節，增強同學仔對社區嘅歸屬感，養成回饋社會嘅好習慣！例如青年樂隊經專業導師培訓後，隨即為街坊演出；匹克球初體驗同室內無人機工作坊嘅參加者亦化身小導師，向街坊介紹坊間新興玩意；果膠手繪體驗班同手匠創藝DIY嘅同學仔亦協助導師教街坊製作出屬於自己嘅工藝品。雖然參加者年紀輕輕，但係講解起上嚟都一樣有板有眼㗎！
南區民政處未來會為青年提供更多富有創意嘅平台，畀青少年繼續裝備同認識自己，把握機遇，喺唔同嘅崗位及領域方面貢獻社會！
