@ 
四年一度嘅全國運動會同埋全國殘疾人運動會暨特殊奧林匹克運動會將分別喺11月9日同12月8日喺大灣區盛大舉行 ，雲集全國頂尖運動健兒競逐各項賽事嘅殊榮。今次香港更首次同廣東及澳門攜手合作，共同承辦呢項國家最高水平同埋規模最大嘅全國綜合運動會，意義非凡！
為響應呢項體壇盛事，同時推廣香港賽區有份承辦嘅手球運動，元朗民政處、元朗區青年發展及公民教育委員會，元朗商會中學同元朗商會小學協力舉辦咗一場精彩嘅手球體驗活動 ，畀區內超過400名中小學生了解同埋體驗手球活動，亦透過幾位現役香港手球代表隊成員嘅分享，燃起青年人對運動嘅熱情同夢想 。元朗民政專員Gordon同青公委主席兼中國香港手球總會會長嘅李聖根都有到場支持。
手球係一項節奏快、講求團隊合作嘅運動，唔單止可以鍛煉體能同埋反應能力 ，更可以培養團隊合作精神及戰略思維 。幾位嚟自元朗嘅香港手球代表喺活動中親自示範傳球、投射同埋防守技巧，參與嘅同學仲可以親身體驗手球嘅魅力添！
更重要嘅係，運動員們亦分享咗佢哋喺比賽場中嘅得失、如何喺逆境下調節心態 、迎接每一場比賽同埋參加大型比賽嘅秘辛。運動員們更指出，運動唔單止係論輸贏 ，更重要嘅係學習堅持同埋勇敢面對挑戰嘅精神 。呢啲寶貴經驗同心得分享，啟發咗年輕人勇於追夢嘅信念，讓佢哋學會從失敗中成長 ，並將運動精神帶入生活嘅每一個角落！
全運會男子手球嘅比賽會喺11月1日開始。祝願香港手球隊喺全運會上有精彩嘅表現，亦祝願手球運動喺香港蓬勃發展，培育更多優秀運動員 !
@ 
@