@ 
今年係抗戰勝利八十周年，喺9月至10月中，屯門民政處聯同教育局屯門區學校發展組、屯門區中學校長會及屯門區小學校長會，合辦咗六場抗戰歷史簡介會暨抗戰紀念碑導賞活動，帶領同學們認識抗戰歷史。
簡介會由嶺南大學香港與華南歷史研究部結合歷史資料、照片同短片，向同學們細述抗戰歷史，特別係抗戰期間廣東及香港人民共同抗敵嘅事蹟。同學們都好專注聆聽，了解抗戰時期嘅艱苦歲月，同埋中華民族兒女堅毅不屈嘅抗戰精神。活動唔單止加深咗同學們對抗戰歷史嘅認識，更讓佢哋明白到抗戰先烈作出嘅巨大犧牲同貢獻。
簡介會後，同學們去到屯門龍鼓灘「劉春祥抗日英雄羣體紀念碑」。1943年，劉春祥等12名抗日先烈喺龍鼓洲一帶海域奮勇抵抗日軍，壯烈犧牲。喺紀念碑現場，嶺大導師喺紀念碑前為同學們進行實地導賞，講解劉春祥等抗日先烈當年保家衞國嘅英勇事蹟。大家亦合唱國歌，進行獻花同鞠躬儀式，緬懷抗戰先烈，氣氛莊嚴。
活動讓同學們進一步認識抗戰歷史，透過親身參與感受，加強民族認同感，提升愛國情懷，珍惜得來不易嘅和平。希望同學們將呢份情懷帶到日常生活中，努力學習，裝備自己，將來為國家同香港貢獻力量！
