@ 
適逢今年係東江水供港60周年，日前（11/10）離島區青年發展網絡帶領一眾同學到船灣淡水湖參觀 ，喺水務署導賞員帶領下了解東江水供港對香港穩定供水系統嘅重要意義 。
香港食水需求量大，每年降雨量亦唔穩定 ，單靠本地集水區嘅集水量並唔足以應付香港需求。為咗解決香港供水問題，國家自1965年起為香港供應東江水 ，而東江水都成為香港供水嘅主要來源。
跟隨住導賞員，同學到達兩個處理同儲存東江水嘅重要水務設施參觀。第一站，同學到達大埔頭原水抽水站 ，認識東江水原水跨越超過70公里輸送到香港後嘅一連串處理過程，包括沉澱、過濾、消毒等。同學都慨嘆原來平日使用嘅每一滴水，都係來之不易，要好好珍惜 。
第二站，同學登上小山丘，由高處欣賞船灣淡水湖呢個全球首個海中興建嘅水塘 。每年數億立方米嘅東江水會經3路水管輸送到香港各個水塘同濾水廠 。船灣淡水湖作為第二大容量嘅水塘，喺儲存東江水上擔任重要角色。而喺每年12月東江輸水管保養維修嘅時候，船灣淡水湖預先儲存嘅東江水就繼續確保香港供水穩定 。
喺導賞員講解下，大家都明白香港食水得來不易 ，東江水對維持香港供水穩定尤為重要，亦明白要「飲水思源」，感恩國家對香港嘅支持 。
