@ 
由中西區民政處及中西區青年網絡合辦嘅「Warm Up 中西區！」全運項目體驗日星期六（25/10）喺士美非路體育館圓滿舉行！
體驗日由中西區青年社區建設委員會同中西區青年發展及公民教育委員會嘅青年委員自發成立籌備專組一手一腳策劃同推行，青年委員都擺咗好多時間同心機，希望令活動內容豐富又精彩。佢哋仲準備咗表演環節，同全場合唱歌曲《強》，將氣氛推上高峰！兩位青年會嘅副主席王嘉駿同余學禮仲接受咗香港電台即場訪問，分享籌辦今日活動同委員會喺地區推廣全運會嘅點滴。
大會非常榮幸邀請到中國香港羽毛球代表隊隊員伍家朗Angus出席，同大家分享全運會備戰情況。Angus更親自落場，同第九屆全港運動會中西區羽毛球得獎運動員Lauren一齊玩羽毛球九宮格 ，以另類方式切磋球技，為年青運動員打氣。
當日活動涵蓋場地自行車、擊劍、高爾夫球、七人制橄欖球等十五運會香港特區承辦嘅競賽項目；又有舞龍、坐式排球同輪椅舞蹈等群眾賽事同殘特奧會項目。新興運動愛好者仲可以試玩埋地壺球添！會場亦設有「運動員的一天」互動體驗，透過小遊戲及運動挑戰，了解運動員嘅訓練日程，感受佢哋背後付出嘅努力同堅持。參加者都非常投入各項體驗，齊齊warm up熱身，迎接全運。
2025年立法會換屆選舉將於12月7日舉行，會場特設遊戲攤位，增進大家對立法會選舉嘅認識。政制及內地事務局副局長胡健民更特別到場，呼籲各位選民盡公民責任，12月7日齊投票！
@ 
@