@ 
臨近重陽節，又係一眾孝子賢孫掃墓嘅時間，大埔民政處一如既往認真做好防火安全工作，努力做到零山火。
除咗喺認可殯葬區鄰近位置預先進行剪草工作，民政處亦透過大埔鄉事委員會及西貢北約鄉事委員會轉發電子防火宣傳單張 及信息，提高村民節日嘅防火安全意識。
近日，大埔區防火委員會更聯同大埔消防局、社區應急先鋒名譽會長會(大埔區)及大埔區社區應急先鋒到龍尾村休憩處，向村代表、村民同埋喺附近殯葬區掃墓嘅人士，派發宣傳單張。專業嘅消防員即場講解防止山火嘅要點，又示範防火拍嘅應用，一眾村民及掃墓人士都好畀心機聆聽講解。一眾委員再到黃宜拗同大埔墟港鐵站一帶，向區內居民及掃墓人士派發防止山火宣傳單張及急救包 紀念品。市民反應積極，廣泛宣揚到防止山火嘅信息。
另外，為深入推廣節日防火意識到大埔區家庭 ，大埔區防火委員會及社區應急先鋒名譽會長會(大埔區)合辦「 大埔區節日防火親子填色 創作比賽」，透過區內幼稚園，邀請幼稚園學生聯同家長，一齊參加親子填色比賽，發揮創意 ，藉活動從小培養兒童防火意識。評審小組最終會從各幼稚園篩選後推薦嘅作品中，選出冠亞季軍 及優異作品。活動截止日期係11月21日，大埔區幼稚園學生及家長要把握機會參加呀！
