@ 
為加強市民對詐騙等罪案嘅警覺同防範，葵青區撲滅罪行委員會喺上周末(25/10)聯同葵青民政處同葵青警區喺青衣長發廣場舉行咗「滅罪之聲遍葵青」活動 。葵青區撲滅罪行委員會主席林楚昭、副主席馬家駿及一眾委員齊齊出席活動，大力推動滅罪同防騙。林主席更呼籲市民要時刻保持警覺 、提高防騙意識，切勿讓騙徒有機可乘 。
活動有學校、地區團體及歌手表演，包括香港善導會甦機健康團嘅伸展運動示範 、活潑可愛嘅幼稚園學生歌舞表演 、深受年輕人喜愛嘅街舞 、以及充滿動感嘅花式跳繩及花式籃球表演 。此外，活動亦回顧咗滅罪會去年舉辦嘅一系列活動，並播放相關花絮片段，以輕鬆方式宣傳推廣防罪及滅罪信息 。
大會今次仲設置咗以防騙同禁毒為主題嘅問答環節 、防騙吉祥物「提子」打卡位 ，仲有由監警會設置嘅攤位遊戲 。市民踴躍參與，氣氛熱鬧 。活動尾聲，大會更向在場居民派發實用嘅防騙宣傳品，提醒大家時刻保持警覺，齊心協力打擊罪案 。
