@ 
由香港青少年服務處賽馬會粉嶺綜合青少年服務中心主辦、北區民政處同區內各青少年團體合辦嘅「Chill級青年@北區 - 潮玩新興運動」上星期六（25/10）喺聯和墟社區會堂舉行咗啦！
當晚參加者體驗咗3項新興運動 ，包括： 雪合戰 - 大家以豆袋代替雪球模擬喺雪地上打攻防戰 ，一攻一守，發揮合作精神；電競瑪利歐賽車 - 透過利用Nintendo Switch 操控搭載攝影機 嘅遙控賽車嚟進行比賽 ，跨越唔同嘅障礙 ；嘩嘩嘩！仲有劍球 - 由專業劍球導師教授青年劍球嘅基礎花式「大皿、小皿及中皿」 ，一拋一接，訓練手眼協調 。活動鼓勵青少年建立運動習慣及探索多元興趣 ，大家都玩得好投入，大讚新興運動又新鮮 、又好玩 、又刺激 ！大家都意猶未盡 ，話要多啲參與呢類咁正嘅活動！
見到大家咁鍾意，北區民政處未來會聯同地區青少年團體舉辦呢類「Chill級」有意義嘅活動，推廣健康正向訊息 ，發掘青少年嘅潛能 ，挑戰自我提升抗逆能力！
