@ 
由學生突然成為職場新鮮人？佢哋唔係韓劇角色，而係一班升中四、中五「成功有約」學員參加咗由屯門民政處同屯門區青年發展及公民教育委員會舉辦嘅「短期商業機構體驗」活動！
大會喺工作體驗前安排咗前期訓練，提供各種職場貼士，由第一日返工嘅衣著配搭，到工作態度，仲有與同事及上司嘅溝通技巧，瞭解如何恰當地主動學習等。
學員喺8月5日至8日一連4日分別去到唔同嘅機構進行體驗！感謝各大企業及委員協助安排各類型職位，種類遍及咖啡師、行政、零售、法律、醫療科技及工程等行業。各提供職位嘅機構亦安排人員帶領學員並提供工作指導。學員透過親身體驗機構嘅日常工作，加深對行業嘅認識。
完成四日體驗後，學員喺分享會上都迫不及待分享佢哋當中嘅得著，大家都話今次嘅體驗機會難得，亦經歷咗好多難忘時刻，仲話呢次經驗對之後升學同就業發展有所啟發。
