@ 
第十五屆全國運動會仲有一星期就正式開幕！昨日(2/11)早上，香港、廣州、澳門同深圳四城同步進行火炬傳遞，吸引大批市民沿途見證，觀賞火炬傳遞過程，為運動員歡呼打氣，點燃對全運會嘅熱情！
除咗有150名嚟自中西區嘅大人同小朋友親身到金紫荊廣場沿途打氣點觀賞盛況外，中西區嘅居民亦齊聚西營盤社區綜合大樓嘅「動感連線觀賞站」。透過實時直播，一同見證火炬傳遞嘅精彩過程，感受全運倒數嘅熱烈氣氛！
香港站嘅火炬傳遞由上午9時30分開始，全長約10公里，由添馬政府總部至啟德體育園，共有50名火炬手參與。火炬橫越維港兩岸，途經多個香港著名地標，包括中環及灣仔海濱、香港回歸祖國紀念碑、金紫荊廣場等。無論大人定小朋友都熱情高呼，為火炬手打氣，全城投入，氣氛高漲！
今次火炬傳遞活動展現香港作為「盛事之都」嘅魅力！火炬傳遞結束後，四城火種將匯聚廣州進行融火儀式，並於11月9日開幕禮上燃點主火炬。全運會即將舉行，大家一齊做好準備為運動健兒鼓掌打氣！
除咗投入全運，嚟緊12月7日亦都係2025年立法會換屆選舉。投入選舉，共創未來，中西區民政處亦喺現場擺設宣傳品，提醒大家要盡公民責任，準時去投票！
@