@ 
「全運GOAL 全城GO」！四年一度嘅全國運動會已經喺11月9日盛大開幕 ，全國頂尖健兒雲集大灣區，競逐各項賽事嘅殊榮 。為咗響應呢項體壇盛事 ，元朗民政處、元朗區青年發展及公民教育委員會、元朗區青年網絡聯同東華三院賽馬會天水圍綜合服務中心帶領一眾元朗區嘅同學於11月17日前往香港單車館觀賞全運會嘅場地單車競賽，一同感受國家頂級賽事嘅氛圍 ，為本港運動員打氣 ，同時亦為元朗區青年Fans Club 活動 - 「全運全接觸」揭開序幕 。
場地單車賽煞科日有男女子凱林賽決賽同埋女子全能賽兩項賽事，競賽過程精彩刺激，不容錯過 ！比賽中，車手嘅技巧、耐力同埋策略都扮演重要嘅角色，佢哋需要喺高速運動中隨時作出決策，選擇最佳時機突圍 ，係爆發力同埋判斷力嘅較量，亦係戰術同極致技術嘅比拼 ！港隊代表喺賽事中奮力激戰 ，同學們出盡全力為我哋嘅運動員打氣，鼓勵支持之聲不斷，令出賽運動員倍感振奮，拼力爭勝 。大家好幸運可以喺現場見證港隊李思穎奪取女子全能賽冠軍，同埋元朗區青年發展及公民教育委員會主席李聖根為佢頒贈吉祥物 。另外大家又可以同麥迪遜賽冠軍之一梁穎儀同埋港隊代表梁寶儀同翁浚皓分享比賽點滴 ，此行收獲滿滿，充滿著興奮同喜樂。
精彩嘅全運會不單為元朗區嘅青年學子帶嚟難忘嘅觀賽體驗 ，激發佢哋對體育運動嘅熱情，更令佢哋為國家喺體育方面嘅成就感到自豪 ！我哋祝願第十五屆全運會取得圓滿成功，香港運動員繼續喺賽事中發光發亮。
承接住全運會全城運動狂熱嘅氣氛 ，除咗區內已設置燈飾支持港隊之外，元朗區青年網絡將會舉辦「全運全接觸」活動，到時將邀請現役港隊場地單車運動員於香港單車館同參加者互動 ，透過場地單車體驗活動，延展全運會嘅體育精神，培養元朗區青年人堅韌不屈嘅拼搏毅力。
@ 
@